Romans 11

Shekwoyi To Na Wo Aza Ɓom

1Ma nya ɓo, Shekwoyi ku owo aza a Yahudiyi yanu? Awo, ko fye wyi, Fye pa ge mi zhin Yahudiyi nu n mihin, Ibrahim yawyi n Banyami bye.

2– 3Awo, Shekwoyi to yawo aza n wakni tunyi n sapan, fye pa ɓolo n littafi a da tu ɓeye tukwo? Anabi Iliya ɓei cibwi kpe Shekwoyi ntu n na Yahudiyi tukwo, shi a ku Shekwoyi anabi wu, ai la Shekwoyi a bagadi ɓaya, Iliya ɓei gye ge owo nu bwa cedna n knihin n wo gmanyi woi ye Shekwoyi, ɓa zhin a tna ɓa wuwo n wohin.

4Fye pa amsa lo n Shekwoyi ɓei gawo? “Shekwoyi ɓei ciwo ge, awo, oho nu to ce n ho gmanyi yin. Mi n na azayi lo lo dubu tnaba n ɓa yemi lo, bai to gba shan.”

5Kwo wu lo lo nu n naiye. A Yahudiyi vinya nu to pmi avun wu Shekwoyin. Azalo fyewyi n na gniɓa ntu n Shekwoyi alheri ɓo n wa kniɓa. 6Ngye Shekwoyi alheri nu agye oɓa ɓemana zhin nu ton, nzokwoye cauta to shan kyauta nu zhin, kwo to zhin cauta nu, zai ya zhin tnu-tnu nu wa bwan.

7Kwo wulo n lonu, A Yahudiyi n mwa to bwa Shekwoyi alheri nɓa zanshin. Fyewyi n ku bwa aza n Shekwoyi wa kni-ama aza nɓa ce nyi awye n ku ɓa bua. 8Nyanu n Shekwoyi ɓeda da sanu n kwo ci n cei ge, Shekwoyi laɓa shigye, woi guɓa awye n na tunbuayi n na bai to ɓa kpe oɓo ye n yi da, sa n ya gna ɓa Kristi ɓo n cei. Kwo wulo n lonu nu har naiye.

9Dauda Esu ɓei ku ce da sanu n wo ɓei ci n cei ge, “Fwa oɓa nyagyi manayi n anabarka do yi kwo pi ɓa agam ɓagye nge ɓeho to lo n ɓa; tasin n Shekwoyin. Fa anya a manayi ye ɓa je zekpe ɓa, ɓa wuɓa, ɓa ɓa ɓaya. 10Fa oɓa awye ɓa dna wyegma n na bai to ɓa gye wyeban, ɓa zan-zan n ya kpe ntu n na kaya shan wo ɓo.”

11Kwa wunu, nge Shekwoyi ku owo aza ya har abada? Awo, Owo nufi n na bai abyedo ɓa bwa pwopwo. N na bai ɓa Yahudiyi ɓa wo she ɓa ya Shekwoyi gni-gni zanshin ga ɓahin. 12Nsaiye, ndei anyi vinya ku nya bwa ntu Shekwoyi gni-gni ɓo, sanu n na Yahudiyi ɓa ce bonyi to ɓa ye kwom. Ai anyi ɓei gna anabarka bwa sanu n a Yahudiyi ɓa gwo Kristi.

13Shi fye kpelo ge, Shekwoyi lami kni owo tnu-tnu yi nfye aba abyedo, mi gnafye, mi-i ce a Yahudiyi ɓepa shi mi ɓa mi nsun. 14Nna bai n kwo yezhin ma zhin ɓa ɓa ye enya n fye abyedo n cei lo, n zokwoyi magni azaho nɓa mi. 15Kwo ɓei ze ɓe wowo ɓai ya ze a Kristi viyi. Sa n Shekwoyi ɓei pmiya n ɓa aba kwa wunu nge wo ɓei pmida anyi wa gaɓa gni-gni. Nsai ye kwo dulo n ɓewowoyi a Yahudiyi ɓa ɓe da Kristi. Kwo ɓei ze ngye aza fi nu na je kukala n efi. 16Shi Ibrahim n na anabi yi zhin Shekwoyi a zanu nyi, oɓa ɓi ɓa ze Shekwoyi aza ce, Ntuge n Shinwan gbegye gyi-gyi-yi okwa bwala ɓa ze a gyi-gyi-yi nu ce.

17Ama a bwala ho n Ibrahim shinwa, a Yahudiyi ho, ala ɓa kaya, efye abyedo a bwala a bmana nya, ngye zaitun bmana nya bwala, a fyefyegyi. Nlonu n saiye fyei gwo anabarka n Shekwoyi ɓei ga Ibrahim n wo aɓiyi ɓai sin shinwa gma n Shekwoyi wa nu n wohin tukwoyi. 18Fye zhin peceiye kada fya gma ntuge aku fye fi n ɓa apita nu. Fye pa nge a kpe fye ye ntuge fye filo n Shekwoyi shinwa nu, Fye zhin abwala nu fye to zhin a gbegye nun.

19“To” ko yezhin lo ha cige aɓei ibma a bwalai ya ntuge a fyemi nu gyi, ntu cenu mi zhin ɓo lo n kwo kunce.

20Fye zhin peceiye. Pa ge a bwala ho, a Yahudiyi a ɓei bma ɓa ya ntu ge ɓato ɓei ga Shekwoyi gaiciya nun, fye zhi n ya ntuge fya gawo gaiciya nu. Fyeto zhin aɓo-kwon, gye gba fyehin tukwo fya zhin igodiya, fya zhin peceiye. 21Ntuge n Shekwoyi to fa abwala nwafi ɓa tunyi n sapan, wo ta fa fyehin.

Shekwoyi Zhin Wa Nu Wo Alkawali

22Shi awye hagye shi Shekwoyi zhin alheri dna ɓo, wo gyiminagyi n na azai nɓa ta vi wo ɓon, ama wo zhin ɓemana ga fye fyei ya gyi abye fya yewo n gaiciya gayi, ama nfye to zhin lo nu m aɓa zun fye ya. 23N zokwo do, Nna Yahudiyi fa ɓa tna gaiciya ga ɓa jeze ɓe da Shekwoyi, Shekwoyi ɓa je ɓa fyegyi n shinwa. Wo n ikoyi lo wa zhin lonu.

24Ntu ge n gye shi Shekwoyi ɓei la ye wa gwo fye n fye ɓei mwa kpa n woi, n fye ɓei zhin zaitun bmana nya bwala, wa fye fyegyi n wo shinwa manayi onya nna ta shin zhin-fye gye ge woto gni n shiri yi nu zhin wa je a Yahudiyi gwo n jesun n ɓa ɓei shin fi n kmisunyi nyin?

25Mi n cei pma fya kpe gaiciya ye n Shekwoyi aba, emi azaje yeyeyi n na bai nfye ta mwa fyehin tukwo fya ya abokwo zhin, E, kwo zhin gaiciya nu nge a Yahudiyi ho zhin gaba lo n Nabari Manayi-nsaiye, ama kwo ɓa bwa esanu la n fye abyedo fya ku ɓe Kristi aba vinya, efye n fya ye fya ɓe.

26N navun Israila vinya ɓapwo. Fye pa oɓo lo n anabi ɓo da n ɓeye tukwo? “Gniyi ɓa gmi n Sihiyona, wa pmi a Yahudiyi awye ya n ɓenukwoyi zhin. 27Nsayi mɓei kuɓa a laifi ya, she ma zhin ɓa alkawali”.

28Nsaiye, a Yahudiyi n mwa begye zhin anuwuyi nu nabari manayi nya. Degye n la ze gyiba nfye aba, ntuge kola ɓe efye abyedo n Shekwoyi cauta yi, Har nsaiye a Yahudiyi zhin Shekwoyi aza yeyeyi nu, ntu n wo alkawali ɓo n wo ɓei zhin Ibrahim, Ishaku n Yakubu yi nyi. 29Gama Shekwoyi cauta n wo yiyi-i kwo ta shan kman, wotajeze n na vunyi n wo alkawali n wa zhin nyin. 30Nsapai, fye ɓei zhin Shekwoyi a nuɓai nu, ama sa n na Yahudiyi ɓei na Shekwoyi cauta aɓo wa gye fyenu sun-sun. 31Nsayi ye a Yahudiyi nu zhin tawaye ama n wyihoi ɓa ɓei gni Shekwoyi sun-sun gye bwa n fyei. 32Gama Shekwoyi ku ɓa ya ga ɓenukwoi zhin n nabai wa gye aza sun-sun vinya.

33O, Shekwoyi, ɓo wo-woyi danu n yi n cei. Owo wyemwa, n wo ɓeyekpei n wo nyabwai kwo dna ɓo lo ya kpe owo shawara ye n wo azokwoi. 34Nyikadonu n yi mi kpe Shekwoyi bugba yelo a? Nyikadonu n ɓeyekpei lo wa ga Shekwoyi shawara wa wu wo zokwo a? 35Nyikado nu ɓa ga Shekwoyi nya kunce kwa zhin wo wa zhin ɓo a? 36Gama anya vinya kun n Shekwoyi aba nu. Anya vinya bwa wye-wyei dna nwo ikonu. Anya vinya nyi ntu wo latu ɓo nu. Mwa-mwa nwo aba nyalo-nyalo Amin.